નેકીના મારગમાં કો’દી ખાંચ નહીં આવે,


નેકીના મારગમાં કો’દી ખાંચ નહીં આવે,
હોય ભરોસો ઈશ્વરનો તો આંચ નહીં આવે.
શુભ કર્મોનાં અનુષ્ઠાનથી જગ પૂજશે તુજને,
કર્મ હશે જો કાળા, પૂછવા પાંચ નહીં આવે.
વ્યભિચારનો રાવણ હરશે શાંતિતણી સીતાને,
પતન રોકવા પછી જટાયુ-ચાંચ નહીં આવે.
સત્યાસત્ય વિચારી જીવનપથ પર પગલાં ભરજે,
આત્મપરીક્ષાથી મોટી કો’ જાંચ નહીં આવે.
જન્મમરણના ચક્કરથી ના કોઈ છૂટ્યું, છૂટવાનું,
કાળદેવતાથી બચાવવા લાંચ નહીં આવે.
‘ચાતક’ થઇ તું રાહ જુએ છે શાને અવતરવાની,
ક્યાંક લખેલું હથેળી ઉપર વાંચ, નહીં આવે.